صحة العيون معلومات شاملة

صحة العيون

” العين عضو حساس جدًا ومحتاج رعاية واهتمام من نوع خاص فأي إهمال بسيط فيها ممكن يؤدي لمشاكل كبيرة “

ـ أهم أعداء صحة العين :-

(1) السكر

ـ السكر مش بس بيرفع مستوى الجلوكوز في الدم لكنه كمان بيأثر بشكل مباشر على العين

ـ وده بيظهر في 3 حاجات أساسية:-

1) التهابات متكررة في العين

2) جفاف مزمن في العين

3) تدهور تدريجي في النظر

ـ في الواقع الناس اللي عندهم سكر

ـ فأكتر 3 أعضاء بتتأثرعندهم هم:

• الكليتين
• الأعصاب الطرفية
• وشبكية العين

ـ وده لأن السكر بيأذي الأوعية الدموية الدقيقة ودي اللي بتغذي الشبكية والأعصاب والكُلى.

ـ وعشان كده لازم أي حد بيعاني من السكر يهتم جدًا بصحة عينه

ـ ويبدأ بخطوة أساسية وهي :-

ـ الابتعاد التام عن منتجات السكر المُعالج مثل

 (الحلويات، المشروبات الغازية، العصائر المُصنّعة، والمعجنات البيضاء)

” فكل ما تقلل سكر كل ما تحمي عينيك و تحافظ على نظرك من التدهور اللي بيجي تدريجيًا “

(2) ضوء الشمس المباشر ( العدو الصامت للعين )

ـ التعرّض لضوء الشمس المباشر من غير حماية للعين خطر جدًا وده سبب رئيسي في ضعف النظر مع الوقت.

ـ الناس كتير بتلبس نظارات شمس رخيصة وده في الحقيقة أسوأ من إنك ما تلبسش خالص!

ـ ليه؟

ـ لأن النظارات الرخيصة ما بتوقفش الأشعة فوق البنفسجية ودي أشعة بتخترق العدسة وتوصل للشبكية

ـ وتسبب :-

• تسمم بطيء لخلايا العين
• حرق في أنسجة دقيقة
• تدهور تدريجي في النظر

ـ النتيجة؟

ـ الواحد ممكن يوصل لسِن 30 أو 40 ويلاقي نظره ضعيف وبدأ يلبس نظارة وهو مش فاهم السبب.

ـ الحل؟

• يا إما تبص في الشمس وتستقبل الأشعة القوية دي بعينك (وده طبعًا خطر جدًا)
• تلبس نضارة شمس أصلية تمنع 100% من الأشعة فوق البنفسجية و تحمي عينك حماية حقيقية.

” الأشعة فوق البنفسجية عدو خطير للعين وبتأثر عليها يوم ورا يوم من غير ما نحس.”

(3) السهر (عدو خفي للنظر)

ـ كتير من الناس مش عارفين إن السهر ليه تأثير مباشر على صحة العين و ده مش كلام مرسل ده مدعوم بدراسات.

 📊اتعملت دراسة على الأطفال اللي بيناموا بدري وخصوصا اللي بيناموا في غرفة مظلمة تمامًا  بعيد عن أي ضوء ولقوا إن نظرهم بيتحسّن بشكل ملحوظ مقارنةً بالأطفال اللي بيناموا متأخر أو في ضوء.

ـ فالعلماء اكتشفوا إن كل ساعة سهر بعد الساعة 11 بالليل بتأثر على الخلايا الحساسة في العين وبتاخد من قوة نظرك ببطء.

ـ تخيّل بقى:

ـ أطفال وشباب طول الليل ماسكين الموبايل أو قاعدين قدام الكمبيوتر والإضاءة قوية والسهر مستمر وبعدين يقولوا:

  “النظر ضعف فجأة”

ـ وده فعلاً اللي بيحصل دلوقتي فبقت فيه زيادة 40% إلى 50% في عدد الأطفال اللي بيحتاجوا نظارات وده بسبب السهر و الشاشات و قلة النوم العميق.

“الراحة الليلية والنوم المظلم مش رفاهية وده علاج حقيقي للعين وحماية ليها على المدى الطويل.”

(4) الكحوليات

(وبالأخص المغشوشة… سمّ قاتل للنظر)

ـ من أخطر أعداء العين اللي ناس كتير مش بتتكلم عنه هو شرب الكحوليات و خصوصًا الأنواع المغشوشة أو المرشوشة.

ـ  الكحول المغشوش بيحتوي على مادة اسمها الميثانول ودي مادة سامة جدًا للجهاز العصبي وخصوصًا العصب البصري

ـ المشكلة إن التسمم الكحولي الناتج عن شرب كحول مغشوش

ـ ممكن يسبب التالي:-

• فقدان النظر بالكامل خلال 12 إلى 14 ساعة فقط من دخول المادة السامة للجسم

ـ والأسوأ؟

• النظر ما بيرجعش تاني في أغلب الحالات
• وده اللي بيحصل فعلاً للناس اللي بيتعرضوا لتسمم كحولي

وفجأة بيصحى مش شايف فالعصب البصري اتسمم

” الكحول المغشوش مش بس خطر على الكبد… ده ممكن يقتل النظر تمامًا.”

(5) الأجهزة الكهربائية والتليفونات

(الموبايل، الكمبيوتر، الشاشة، التابلت… ) فكل ده بقى جزء من حياتنا لكن خلينا نقولها بصراحة:

ـ الموبايل بيمحي النظر :-

ـ ليه؟

• لأن العين مش مجرد عدسة فدي فيها عضلات.
• كل مرة تبص فيها على حاجة (قريبة أو بعيدة ، يمين أو شمال) فالعدسة بتتحرك وتتشد وتتوسع وتتقلص فكل ده بعضلات دقيقة جوه العين.

ـ طيب تخيل معايا:

📲 أنت ماسك الموبايل ومركز فيه من قريب جدًا ساعتين… تلاتة…

ـ يعني عضلات العين متشنجة ومشدودة في وضع واحد طول الوقت!

ـ شوف بقى المثال ده :-

ـ شد إيدك قدامك وافضل شايلها كده ساعة… اتنين… تلاتة

ـ إيه اللي هيحصل؟

• العضلة هتتعب ممكن يحصل شد وممكن ما تعرفش تحرّكها براحتك تاني.
• وده بالضبط اللي بيحصل لعضلات عينك وانت ماسك الموبايل بالساعات!

ـ النتيجة؟

( إجهاد بصري – ضعف نظر – صداع – جفاف – وزيادة في حالات قصر النظر ) وخصوصًا عند الأطفال.

ـ الأجهزة الكهربائية وخاصة التليفونات بقت أكبر سموم العين في الجيل ده.

ـ ودي كارثة أكبر على الأطفال لأن عينهم لسه بتتكوّن وبتتشوه بسبب الاستخدام المفرط للموبايل.

“انتبه… وخلّي وقت بدون شاشات جزء أساسي من يومك.”

(6) التغذية (سر من أسرار قوة النظر!)

ـ كتير من الناس فاكرة إن التغذية بتأثرعلى الجسم بس من حيث الوزن أو الطاقة و لكن الحقيقة إن العين من أكتر الأعضاء اللي محتاجة تغذية دقيقة جدًا علشان تحافظ على وظيفتها فسبحان الله العين مختلفة عن باقي الجسم

ـ تفتكر ليه؟

ـ لأن العين ما فيهاش دم!

ـ فالقرنية الجزء الشفاف اللي بيدخل منه الضوء ما بيمرش فيه أي نقطة دم ولو الدم دخل جوه العدسة و مش هتشوف فالرؤية هتتشوش تمامًا.

ـ طيب إزاي بتتغذى العين؟

• من رحمة ربنا إن الدموع هي اللي بتقوم بدور التغذية هنا و الدموع شغالة على مدار 24 ساعة بتوصّل للعين كل اللي هي محتاجاه من مواد مغذية و أكسچين.
• علشان كده لما العين تجف أو يحصل نقص في إفراز الدموع فبيحصل ضعف في التغذية وده بيأثر على النظر تدريجيًا.

ـ تخيّل كأنك قطعت الدم عن عضو في الجسم فهو بالظبط زي كده

👁️الحفاظ على صحة العين مش بس بالراحة أو تقليل الشاشات…

ـ لازم كمان نهتم بـجودة الأكل لأن التغذية هي اللي بتبني العين من جوه وتحافظ على كل جزء فيها

ـ العين فيها “ماية” و خاصة  الدموع  اللي بتغسل و ترطّب و تغذي و تحمي الشبكية والعدسة.

ـ علشان كده لازم نسأل:

ـ كيفية الحفاظ على العين؟ وإيه الأكل اللي يخلي “مية العين” صحية؟

(1) فيتامين أ

ـ وده الفيتامين الأساسي اللي العين ما بتشتغلش من غيره.

ـ فيتامين أ بيدخل في:

• الحفاظ على رطوبة العين (يعزز إفراز الدموع)
• تجديد خلايا الشبكية
• وقاية العدسة من التدهور
• الرؤية الليلية (يعني يساعدك تشوف في الإضاءة الضعيفة)

ـ مصادر فيتامين أ الطبيعية:

🥕 الجزر

🎃 القرع العسلي

🍠 البطاطا الحلوة

🍗 الكبدة (خصوصًا كبدة الفراخ والبقر)

✅ كل دة غني جدًا بفيتامين أ وبيعطّي العين الوقود اللي تحتاجه علشان تقوم بأحسن وظيفة بكفاءة.

ـ احذر من فيتامين أ الجاهز واختار بيتا كاروتين!

ـ ناس كتير لما تعرف أهمية فيتامين أ للنظر تروح تاخده على طول في صورة مكمل جاهز لكن دي مشكلة كبيرة!

ـ لو أخدت فيتامين أ (جاهز) بزيادة ممكن جسمك يتسمم لأن الفيتامين ده بيتخزن في الكبد ولو زاد عن الحد بيعمل مشاكل كبيرة في الجسم.

ـ لو أخدت بيتا كاروتين (من أكل طبيعي أو مكمل طبيعي) فالجسم بيتصرف بذكاء:

• بيحوّل منه الكمية اللي محتاجها فقط لفيتامين أ
• ولما يكتفي ما بيحولش الباقي و يسيبه زي ما هو من غير ضرر

ـ علشان كده بنقول:

“كل أكل ربنا”

مثل : ( الجزر، البطاطا، القرع، الخضار الورقي )

ـ لأنه مليان بيتا كاروتين والجسم بيختار منه على قد احتياجه.

ـ ولو مضطر تاخد مكمل؟

• ما تاخدش فيتامين أ الجاهز
• خُد بيتا كاروتين في صورة طبيعية لأنه أمان أكتر وبيشتغل حسب احتياجك فقط

ـ فيتامين أ ما يشتغلش من غير الزنك!

ـ ناس كتير تركزعلى فيتامين أ علشان النظر وده صح لكن فيتامين أ مش هيشتغل كويس جوه الجسم و خصوصًا في العين إلا لما يكون معاه الزنك!

ـ الزنك هو اللي بيساعد فيتامين أ يدخل جوه خلايا الشبكية و يتحول لشكل فعّال يساعدك تشوف في الضوء الضعيف و يجدد أنسجة العدسة والقرنية.

ـ  من غير زنك؟ فيتامين أ وجوده زي قلته!

ـ الزنك موجود في:

• المحاريات زي الجمبري والسبيط
• لب القرع (اللب الأبيض)
• اللحوم
• البيض
• المكسرات

 💊الجرعة اليومية اللي الجسم يحتاجها من الزنك:

ـ من 25 لحد 50 ملليجرام في اليوم ويفضل من مصادر طبيعية أو مكمل نقي.

ـ الزنك وفيتامين أ عاملين زي فريق… بيكملوا بعض وبيحافظوا على صحة العين من جوّا وبرّا و على النظر و قوة الشبكية و رطوبة العين وتجدد الخلايا.

(2) فيتامين ب كومبلكس و تحديدًا “الثيامين”

ـ العين وأعصاب الجسم محتاجين فيتامين ب بانتظام و خاصة الثيامين.

ـ لو بتاكل سكر كتير فاعرف إن الثيامين بيستنفذ بسرعة وده بيأثر على الأعصاب وخصوصًا أعصاب العين علشان كده الناس اللي بتوقف السكر مش بس بتقلل الالتهابات فكمان بتحافظ على مستوى الثيامين في الجسم.

ـ وده بيحميهم من مشاكل الأعصاب الطرفية اللي بتحصل بسبب نقصه.

(3) الـلوتين والزياكسانثين

ـ هما نوع من أنواع الكاروتينويد ودي مركّبات موجودة في النباتات تقريبًا في حوالي من 20 الي 30 نوع كاروتينويد

ـ لكن اللوتين والزياكسانثين بالتحديد بيتخزنوا في العين والمخ بنسبة أعلى 500% عن أي عضو تاني في الجسم!

ـ طب الجسم عرف منين إن دول مهمين أوي للعين والمخ؟

ـ يعني ربنا خلى جزء بسيط يروح للكبد لكن 500% يروحوا للعين والمخ فده مش صدفة و ده دليل على إن العين والمخ محتاجينهم بشكل أساسي.

ـ موجودين في:

• الخضراوات الورقية
• البيض
• السلمون (اللي كمان فيه أوميجا3)

ـ الحاجات دي كلها بتمنع الأكسدة اللي بتحصل في العين.

“إحنا بنشوف من منطقة في الشبكية اسمها الماكيولا أو “البُقعة” و هي المكان اللي بيتجمع عليه الضوء.”

ـ المشكلة؟

ـ بعد سن معين بيبدأ يحصل حاجة اسمها

(Macular Degeneration )

• أو تنكّس البقعة وده بيؤدي لتدهور الرؤية تدريجيًا.
• اللوتين والزياكسانثين بيحموا الماكيولا من حاجتين:

1) يمنعوا الأكسدة والالتهابات.

2) يعملوا عازل ضد الضوء الأزرق اللي هو أكتر حاجة بتدمّر الماكيولا.

ـ النتيجة؟

• نظرك يفضل قوي وما يتأثرش بسهولة حتى مع التقدّم في السن.
• كمان فيتامين سي و اية مهمين جدًا كمضادات أكسدة.
• بيحموا الماكيولا من تأثير الأكل السيء و الضغط العصبي و التلوث و كل أسباب الأكسدة

ـ الأوميجا3 ضروري جدًا للعين:

ـ موجود في الأسماك وخصوصًا السلمون و بيساعد على ترطيب العين وتقليل الجفاف.

ـ إيه الأكل اللي تحبه العين؟

• الجزر
• القرع
• البطاطا الحلوة
• الأفوكادو
• الخضراوات الورقية
• البيض (وخاصة الصفار)
• الشوكولاتة الداكنة
• الخميرة الغذائية
• التوت
• زيت الزيتون
• عشبة القمح

ـ كل ده مليان مضادات أكسدة.

” انسَ خرافة إن بعد الأربعين لازم نظرك يضعف!”

ـ كيف نحافظ على العين؟

(1) ما تفرّقش عينك!

ـ لما تفتح عينك زيادة عن اللزوم أو تجهدها بتكسر الأوعية الدموية .

(2) الدراسات قالت:

ـ الأطفال اللي بيناموا في غرفة مظلمة تمامًا (من 10 مساءً لـ 6 صباحًا) عندهم فرصة أقل بنسبة 35–37% في لبس النظارات خلال 5 سنين وده بسبب إفراز الميلاتونين ونوم مبكر خالي من السهر.

(3) زود مضادات الأكسدة في أكلك.

(4) بالنسبة للكمبيوتر والموبايل

ـ كل 45 دقيقة قوم واتحرك  واشرب مياه.

• جفاف العين بيزيد مع قلة المياه.
• خليك بتحرّك جسمك وعينك.

(5) ما تفضلش باصص في موبايل أو شاشة أكتر من 45 دقيقة

• خد راحة 10 دقايق
• اشرب كوباية مياه
• بص على حاجة بعيدة زي شجرة أو السماء
• كل شوية درّب عينك على التفاصيل البعيدة

“👀عضلات العين لازم تتحرك علشان ما تضعفش.”

ـ تمرين عضلات العين:

• بص لفوق 30 ثانية
• غمض عينك
• بص لتحت كأنك بتشيل حديد

(وأنت ثابت ما تحرّكش رقبتك)

• لف عينك 5 لفات يمين و5 شمال
• كرر 3 أو 4 مرات

ـ ده بيحرّك عضلات العين كلها و يخليها قادرة تشوف بوضوح في كل الاتجاهات.

ـ نصيحة :-

ـ اغسل عينك بمحلول مخصص للعين.

ـ وأنت بتغسلها املأ فمك ماية!

ـ ليه؟

ـ لأن عضلات العين بتفتح مع ضغط الماية في الفم وده يقلل الجفاف ويحسّن الرؤية.

ـ حافظ على عينك قبل ما تحتاج لنظارة.

ـ لو ارتحت و نمت كويس و شربت مايّة و أكلت مظبوط فعينك هتشوف العالم بأنقى صورة!

“👁️عينيك مش مجرد وسيلة للرؤية… دي نافذتك على الحياة فاحفظها وحركها، وغذّيها.”