البواسير والناسور الفرق بينهم وافضل طرق العناية بيهم
لازم ف البداية تعرف انت عندك ايه بواسير والا ناسور واسبابهم عشان تقدر تهتم بيهم صح
ـ مش كل ألم في فتحة الشرج اسمه “بواسير”!
ـ ناس كتير أول ما تحس بألم أو تلاقي شوية دم أو حتى حاجة طالعة حوالين فتحة الشرج…
على طول تقول: “أنا عندي بواسير!”
ـ طيب يا سيدي… انت عرفت منين؟
ـ الموضوع مش كده خالص في أمراض كتير بتحصل في نفس المنطقة وكل واحدة منهم ليها أعراضها وعلاجها:
ـ ما هو الفرق؟
ـ البواسير:-
ـ عبارة عن أوعية دموية منتفخة ممكن تنزل دم أو تحس بحكة أو تورم بسيط وأوقات ممكن تخرج برا الشرج.
ـ الشرخ الشرجي:-
ـ جرح صغير في فتحة الشرج اللي يميّزه إنه مؤلم جدًا جدًا اثناء وبعد التبرز وبيكون الألم أشد من البواسير.
ـ الناسور الشرجي:-
ـ قناة أو فتحة غير طبيعية بتربط بين داخل القناة الشرجية والجلد من برا وده ساعات يعمل خراج أو إفرازات صديدية.
ـ مين اللي يأكدلك؟
ـ مش حضرتك ولا حتى الصيدلي فلازم تروح لدكتور جراحة هو الوحيد اللي بالكشف يقدر يفرقلك بين:
✔️ بواسير
✔️ شرخ
✔️ ناسور
ـ علشان تاخد العلاج الصح لأن كل واحد ليه طريقة علاج مختلفة.
ـ ألم الشرج اللي بعد الحمام وبيفضل مستمر مع حرقة جامدة فده في الأغلب شرخ
ـ إنما البواسير في أغلب الحالات ملهاش ألم شديد إلا لو خرجت برا أو حصل فيها تجلط دموي.
ـ يعني إيه بواسير؟
ـ البواسير ببساطة احتقان وتضخم في الأوردة الموجودة داخل الشرج وأسفل المستقيم.
ـ يعني إيه الكلام ده؟
ـ يعني فيه أوعية دموية في المنطقة دي الدم مش قادر يمشي فيها بشكل طبيعي فيبدأ يتجمع ويتورم فتبقى عاملة زي الدوالي اللي بنشوفها في الرجل لكن مكانها في الشرج.
ـ والسبب الرئيسي ورا ده هو:
✔️ الإمساك المزمن
ـ لأن لما البراز بيكون ناشف وبتضغط جامد وقت الحمام و الدم يتراكم في الأوردة دي فتبقى بواسير.
ـ أنواع البواسير:-
(1) بواسير داخلية
- موجودة جوه قناة الشرج
- مش بتظهر من برا
- ساعات تنزل دم مع الحمام
- ساعات تحس بيها ككتلة داخلة طالعة مع الإمساك
(2) بواسير خارجية
- بتبقى حوالين فتحة الشرج من برة
- بتبان ككتل أو تورم
- ممكن تعمل ألم أو حكة
- ولو التهبت بتنزف وبتعمل ألم جامد
ـ درجات البواسير:ـ
ـ إحنا بنقسم البواسير لـ ٤ درجات على حسب شدة الحالة:
ـ الدرجة الأولى:
- بواسير متورمة جوه
- مش بتنزل لبرا
- غالبًا ملهاش أعراض واضحة
ـ الدرجة الثانية:
- بتخرج أثناء التبرز
- وبترجع لوحدها بعد الحمام
ـ الدرجة الثالثة:
- بتخرج أثناء التبرز
- ولازم تدفعها بايدك علشان ترجع مكانها
ـ الدرجة الرابعة:
- البواسير متدلية دايمًا لبرا
- لا بترجع لوحدها ولا حتى بالدفع
ـ ودي أكتر درجة مزعجة وخطرة و بتحتاج تدخل جراحي في الغالب
ـ في الدرجة الأولى والثانية والثالثة تقدر تتعالج من غير جراحة لو التزمت بنظام غذائي مظبوط و شرب ماية وأدوية مناسبة.
ـ لكن في الدرجة الرابعة العلاج بيكون صعب بالأدوية فقط وساعات بيحتاج عملية بسيطة.
ـ أسباب البواسير:-
- الامساك
- الحمل
- شيل أوزان تقيلة
- الجلوس لفترات طويلة
- استخدام الشطاف القوي
- أكل فقير بالألياف
- قلة شرب مية
ـ أعراض البواسير:-
ـ الغريب إن البواسير في أغلب الحالات مبتكونش ليها أعراض واضحة أو مزعجة.
ـ يعني ممكن الشخص يكون عنده بواسير من الدرجة الأولى أو الثانية ومش حاسس بأي حاجة!
ـ لكن لو فيه أعراض بتبقى بسيطة مثل :-
- إحساس بعدم الراحة في منطقة الشرج
- حكة أو التهابات بسيطة
- وجود زوائد أو كتل حوالين فتحة الشرج
- أحيانًا بقع دم بسيطة على ورق التواليت بعد التبرز
ـ متى تزيد الأعراض ؟
ـ لما المريض يهمل البواسيرساعتها بتحصل مضاعفات وتتحول المشكلة البسيطة لحاجة مزعجة جدًا:
ـ مضاعفات البواسير:-
ـ تجلط البواسير:
- يحصل إن الدم يتجلط جوا الوريد المنتفخ فتعمل كتلة صلبة ومؤلمة جدًا حوالين الشرج.
ـ نزيف شديد:
- البواسيرساعات تنزف لكن لو زاد النزيف ممكن يوصل لدرجة ان المريض يدخل في أنيميا (فقر دم).
ـ عدوى وخُراج:
- البواسيرالملتهبة لو دخلها بكتيريا تعمل خُراج شرجي (كيس صديد مؤلم جدًا).
ـ ناسور شرجي:
- وده بيحصل في حالات نادرة لما يحصل قناة غير طبيعية بين داخل الشرج والجلد من برة.
ـ البواسيرمش دايمًا مؤلمة إلا لو حصل فيها مضاعفات.
ـ علاج البواسير:-
ـ علاج البواسير بيبدأ دايمًا بمحورين:
(1) علاج من الجذور
(2) علاج موضعي للأعراض.
ـ أولًا: علاج السبب
ـ علشان تمنع تطور البواسير وتعالجها من جذورها:
✔️ شرب سوائل كتير (مياه، شاي أعشاب)
✔️ تناول ألياف كتير (خضار، فاكهة، شوفان)
✔️ أكل فواكه مثل:
- القراصيا (ملينة طبيعية ممتازة)
- الخوخ
- البرقوق
✔️ زبادي بلدي (مفيد للأمعاء والقولون)
✔️ دهون صحية (زيت زيتون، زيت جوز هند)
✔️ رياضة يوميًا حتى لو مشي ٣٠ دقيقة
ـ لأن 95٪ من حالات البواسير بتتحسن بالخطوات دي مع كريمات بسيطة وبتختفي.
ـ ثانيًا: العلاج الموضعي
ـ لو فيه ألم أو تورم أو نزيف بسيط
ـ ممكن نستخدم دهان طبيعي أو أدوية موضعية.
ـ أفضل تركيبة موضعية:
صبغة الكولين (1)
- تركيز من 0.5% إلى 5%
- مضاد التهاب قوي جدًا
- يقلل التورم بسرعة
- يعالج التهاب البواسير موضعيًا
(2) خـلات الرصاص :
- بنسبة 1:1 مع صبغة الكولين
- مضاد للتورم
- يقلل الاحمرار والالتهاب
ـ خلات الرصاص آمنة
- للاستخدام الموضعي لفترة قصيرة (٣-٦ أيام)
- لا يُنصح باستخدامها لفترات طويلة (شهر أو شهرين) بسبب احتمالية تراكم الرصاص بالجسم مع الاستخدام المزمن
ـ وعمومًا في خلال أسبوع هتلاقي البواسير تمام
ـ طريقة الاستخدام:
- خلط صبغة الكولين مع خلات الرصاص بنسبة 1:1
- دهان المنطقة مرتين يوميًا
- بحد أقصى أسبوع
- بعدها غالبًا الأعراض بتختفي
ـ متى العملية؟
✔️ لو البواسير بقت درجة رابعة
✔️ أو حصل نزيف شديد
✔️ أو تجلط
✔️ أو تحولت لخُراج
وقتها لازم تدخل جراحي
ـ نصائح
- اصلاح الإمساك
- شرب ماية كتير
- وصفة صبغة الكولين مع خلات الرصاص لمدة ٣-٦ أيام
- الحركة اليوميه
- مكملات لو محتاج مثل (دافلون +فيتامين سي+اوميجا3)
- يستمر على نظام الألياف
- يتجنب الجلوس الطويل
- يخلي رياضة يومية
- ياخد وجبات فيها دهون صحية
- وياخد شاور مش شطاف قوي
ـ وده هيريحك جدًا وهيحل 95٪ من الحالات من غير عملية.
